Quando se svizìna le elezióm... – Di Cornelio Galas

Na che me piàs (se fa per dir) l’è veder en ste liste l'è quei che ha cambià bandéra. Cioé quei che salta da 'n partito a l'àlter. Per saltar sèmper sul car de chi vinze

Tra pòch pù de 'n més se va a votar en Trentìm per rifàr quei consigli comunali che se doveva cambiar nel magio pasà.
Sol che dopo è vegnù fòra la storia del virus. E alóra, come i ha spostà tute le feste, tute le manifestazióm, anca ste elezióm le ghe sarà a setember.
Però par no nele scòle. Ma da qualche altra banda.
 
Entànt gh'è zà le liste dei candidài. Tanti. Trane che en quei comuni dove gh'è poca zènt zà de suo e che per meter enséma na lista bisognerìa far votar anca cunèi e galine.
L'è semper bèl lèzer i nomi dei candidài. Perché te capìssi subit tante robe. Per esempi: quando en lista te trovi parenti, zent dela istessa dita, cosìni del tale che vegnirìa a esser neò del vecio assessor.
No sté pensàr màl. Pòl capitar neh che ghe sia ste coincidenze. Sé voi che pensé semper mal. Sè voi i malfidenti.
 
N'altra roba che me piàs (se fa per dir) veder en ste liste l'è quei che ha cambià bandéra. Cioé quei che salta da 'n partito a l'alter.
Me ricordo – parlém zamài de trent'ani endrìo – um de Riva che el néva en giro col portafòi piém de tèsere. Oltra a quele dela patente e del bancomat el gavéva quéle de almém oto partiti.
«Perché – el me diséva – bisogn saltàr semper sul cavàl giust, cramento.»
 
Parlénte de programi? Prové a lèzerli.
No ghe sarà nisùm che dìs de volér aumentàr le tasse comunali.
O darghe adòs ai vèci e ai zoveni. O far de prài e vigne tanti condomìni.
Po', quando semài, suzederà el contràri, i dirà che l'era colpa de quei vegnùi prima. L'era stà lori a far quei progeti lì. E no se ghe pòl far gnènt.
 
Da chì a setèmber, sté atenti, ghe sarà tante presentazióm, tanti... come ghe ciàmei? Forum. Dove i vari partiti, i vari candidài i se ne 'n dirà de boi e de vaca.
Po' magari, propri quel che 'l se n'è sentì pù de tuti el tornerà bom al balotagio.
E alora el ve dirà che no se pòl sèmper dir de no. Bisogna anca savér trovar el compromes.
Come dir: i m'ha dàt del móna fim adès? L'è lo stéss, basta che pòda anca mì nar en giunta, oscia.
 
Me vèi anca en mént quel che el gavéva drìo, en scarsèla, almen tre discorsi diversi.
Se en sala i èra de pù quei che la gavéva su con en progèto, el toléva fòra el fòi giust. E ancora, gh'era (i ghe sarà de zert ancora) quei che néva cà per cà. Coi santini. E i se enteresséva dei problemi dele famée.
El fiòl el deve nar soto naja? Oscia, ghe penso mi, te vedrài. Serve en mutuo? No gh'è problemi.
Po' però i passéva dopo le eleziom. E i féva i conti: voi sé en zinque che vota no? E alora perché mi ho ciapà ala seziom zinque de Bolignam sol do voti?
 
Se parla de robe vecie neh. Adès la musica l'è cambiada se sa.
Stè atenti però che dale me bande gh'è ancora en giro el Gino Bam Bam. El gà la so età ma le idee no 'l le ha mai cambiade.
Lù, el m'ha dit na volta, quando el và en gabìna el segna co la matita tuti quanti.
E soto el ghe scrive: «Fè 'n po' voi valà, che tanto no cambia mai gnent.»