Quando nei boschi no gh'era i orsi... – Di Cornelio Galas

Ma no se podrìa trovar el modo de spostarli da qualche banda? Magari en Slovenia dove i troverìa forsi i so bisnòni…

Me ricordo quando – àni endrìo zamài – pràpri en sté stimàne, soratut dopo na bela piòza, se ciapéva na zésta e 'n cortelìm per nar nei boschi.
No solo per fónghi. Ma anca, per dir, per granzóni, ampòmole, fragole.
Ensóma, tut quel che se trovéva de fresch. Senza pagar n'ira de Dio 'n chìlo de finferli, finferle o fonghi dal sangue.
 
I pòsti pù bòni? Sora Vignole, fim su al «Sàss del Conte». Opura en val de Leder, poch prima dele malghe. O ancora su en val de Conzéi, entórno al rifugio «al Faggio».
Gh'era anca quei che néva fim su vers Campiglio. O vers Malga Camp sóra Drena. O a San Zoàn sóra Arco.
El dì dopo finiva tut co na bela polentina arènt. O en d'en bel risotìm.
Ma no gh'era altri penséri. Almem fin quando i ha fat i regolamenti su quanti fonghi te podévi méter nela zésta e 'n dove te podévi nar.
 
Nei boschi, se propri propri, te podévi encontràr qualche cavriòl, qualche scoiàtol, qualche càvra che s'era persa e che tut mal i pastori i era drìo a zercar.
O magari te sentiva fisciàr qualche bìs... Ma el pù dele volte l'era lànze, bastonèri. Pu spaventài de ti...
Da quando i ha més nei boschi del Trentìm i orsi è però cambià tut.
No so voi ma mi, lezendo quel che suzéde zamài dapertut, ho lassà da 'n péz la zesta dei fonghi e anca el vecio cortelìm su nel solèr, da qualche banda che no me ricordo pù.
 
Perché me sa che l'è i orsi adès che i và en zerca de robe da magnar nei boschi e anca vizìm ale case. E magari i pensa che ti te vòi portarghe via el pàm da bòca... Capì come?
Ho lèt en ste ultime stimàne anca che no l'è fasèndo finta de esser morti che te pòi scapàr da l'ors.
Anca perché dài, no sténte a tòrne per le bale, come fat a star lì fermo, senza gnanca fiatàr, quando te vedi en bestiom da en quintàl e mèz che te vei adòs?
 
Ho lezù anca che al Castelér no gh'è pu posto per altri orsi... come ghe ciàmei? Confidenti?
O carateriali, come che scrive l’Adesot.it.
Ma no èlo meio ciamarli envéze pericolosi? Perché no gò gnént da confidar ai orsi, anzi, mem ne vedém e meio stò.
 
Po', per carità, ste bestie le me fa anca pecà. Che ne sàle lòre – che le vèi dala Slovenia e no le capìs gnanca el dialèt dei altri selvàdeghi trentini – che noi névem prima de lore per fonghi en quei boschi.
E che da ste bande gavém l'autonomia e che il ministro Costa el ghe vol bèm ma el Fugàti l'è semper pù stròf quando se parla de lóre?
No se dìs de copàrli (anca se, per dir, ogni àm ai cazadóri i ghe asegna na quota de cavriòi, de camòssi, da poch anca i cinghiali che àra su tut) da sbàrarghe adòs e compagnar dopo co la polentina) perché pàr che en quel caso ghe sarìa quei che fa rivoluziom.
Ma de trovar almém el modo de spostarli da qualche banda. Magari en Slovenia dove i troverìa forsi i so bisnòni.