L'è tut en dàmela tòmela – Di Cornelio Galas

Fé quel che volé voi. Anca se en giro no sento tanta zènt che gà voia de nar de nòf a votar la prosima doménega...

Come è nà le elezióm comunali de la stimàna passàda (compreso el lùni de questa) el savé de zèrt. Così come savré de zèrt che a Riva, Arco, Roveredo, Ala, Caldonaz, Novèla, Valdeilaghi e Volàm se narà al balotàgio doménega 4 otóber.
Cossa vòl dir balotàgio? Che quei che ha ciapà pù voti (i primi dòi per capìrne) en prima batùa, i se zugherà la partìa tra de lori.
Sol tra de lòri? No, perché en sti di chì i podrà – come se dis – aparentàrse con quei restài fòra dai zòghi.
Che però «deventando parènti» de uno o de l'alter i gavrà en càmbi la posibilità de far pù consiglieri (o magari anca de nar en giunta) se vinze quel cha i ha «maridà».
 
Fìm chì, gnènt de strano rispèt ale eleziom fate fim adès co sta lègie eletorale.
Che val pu che alter per comuni che gàbia en tòt de zent che abita en quei posti (senza contar cunèi e galine se sa).
Ma a dirve la verità gh'è dele robe che no m'ha mai convint del tut de sti «misciamenti» de l'ultim minut.
Perché – parlo per esempi de Arco e Riva che conósso meio dei altri sei comuni – gh'è 'l rìscio che se méta d'acordi adès liste e candidài che, per dir, i se varda ancora màl, de travérs sui manifesti dei tabeloni che no i ha gnancora tirà zo.
 
E po' basta nar a rilèzerse quel che i diséva nei comizi o sui santini per capir che i era come cagn e gàt propri con quei che adès i podrìa deventar dei... amìzi per ciapàr su i voti che serve per bater altri che magari i fa la istéssa roba con quei che i ha semper mandà en quel posto.
Diré: l'è cosìta la lègie. E anca altre volte gh'è stà sti «sbatolamenti». Véra, ma mi par che se no se néva d'acòrdi prima per nar d'acordi adés se rìscia de sbagliàr… el tài del prà.
E ancora pù difìzile me par dirghe a quei che ha votà sti parenti perché i néssa per so cont, perché i fés quel che i aveva promés de far... de far nar su sindaco e compagnia bèla de... quei altri.
 
L'è 'n po' come domandar a sti eletóri de far viceversa del deto «sant en piàza e diàol a casaì.
De averghe ensoma do fàcie, de cambiar modo de pensar nel giro de do stimàne.
Bisogna anca dir che sti aparentamenti i podrà anca portar a comproméssi su zèrte robe dei progràmi.
E a dirla tuta na volta, quando se votéva sol na volta, l'era i segretari dei partiti (o i capi dele zìviche) che i se trovéva, magari de scondóm, per vegnirgh'en fòra da situazióm dove quei che aveva vint no i era propri méssi tant bém per averghe en consilio comunale i voti per far quel che i voleva.
 
L'era anca quei i tempi dove 'l diàol e l'aqua santa spess e volentéra i se miscéva. Po' però le lègi le è cambiàde.
Ma me ricordo el pòr Bruno Cagol, a l'Adige, che credo sia stà quel che conosséva meio de tuti le legi eletorali, quando el vardéva i risultati: en dó minuti el te savéva dir quei che néva en consilio, quei trombài e anca a chìe la Dc, per dir, l'avrìa dovù domandarghe da màm per governar en pàze el comum.
Tut màl che ve dìga, fé quel che volé voi. Anca se en giro no sento tanta zènt che gà voia de nar de nòf a votar la prosima doménega...