El temp, el cul e i sióri i fa quel che i vòl lóri – Di C. Galas

Gh'è anca la versióm en latim per i lezùi: «Tempus culusque domini, omnia ei licet»

Diséntela tuta quanta: no sém mai contenti del tèmp. O che gh'è massa calori (e alora sperém nele famose do góze), o piove che dio la manda (e alora se ghe déva na volta la colpa al governo...).
Fato stà tut mal che – come dis el vecio provèrbi – el tèmp, el cul e i sióri i fa semper quel che i vòl lóri.
Anca se a propòsit de sióri, dopo le crisi de sti ultimi ani, forsi bisognerìa meterghe davanti en «forsi» (i pòl far sèmper quel che i vòl).
 
I dìs per esempi che na volta no gh'era tuti sti alagamenti, tute ste frane, sti venti che buta zo mezi boschi (come la Vaia), ste tompestàe che rovina i pomi.
Che l'è tut colpa dei gas dele machine e de le fabriche, de tuta la sporcarìa che mandém su zamai da temp nel ziél.
De sicur qualcos è cambià. Ma l'Àdes per dir nel sesantaséi l'è nà fòra e l'ha fat disastri. E a so temp anca el Varóm a Riva dove quando te sei en tipo strambo i dis: «Te sei fòra come 'l Varóm».
 
Per no parlar dele frane (che ha fat anca morti) vegnùe zò dai monti sora le do gardesane.
De quele dal mont Briom (dove i è drio a fàr adés el valo tomo), de quele su per Tém e 'n altri posti del Trentìm che adès no me vei en ment.
En sti dì chì i ha serà per esempi el pont sula Sarca (perché se dìs «la» Sarca no «el» Sarca) e l'era sècoi che no l'suzedéva.
Aqua fòra anca su per la val dei laghi, al Lufàm vers Torbole.
E pompieri avanti e 'n drìo che no i savéva gnanca pù dove scominziàr a méterghe mam.
 
Quela dela Sarca tut mal l'è na roba che ghe somiglia a 'na vendéta. Perché a so temp, per far nar la zentrale dela luce de Torbole, cossa hai fàt? Na galeria longa che ciàpa la Sarca su vers Sarche e porta l'aqua fim ai tubi grossi sora Torbole.
Gh'è stà dei ani – me ricordo – che tanta zent, tanti comitati (no sol i pescadóri) i domandéva a l'Enel de molàr pu aqua nela Sarca. Che quando no piovéva l'era tut en geróm... tanto che i ha trovà perfìm dele robe antiche, del temp dei romani che svanzéva fòra dala pacièca.
 
De sòlit el mèrcol qualcòs i moléva. E d'istà gh'è ancora qualchedum che fa el bagno vizìm al pont romano de Zenìga.
Te pòi enmaginar alora se la Sarca no la vede l'ora, quando piove, de tornàr a far la vòze grossa... sol che co l'aqua alta la se tìra endòs sporcarìa, àrboi, candolòti, ensoma tut quel che i ghe buta denter o che tut mal vèi su dale so bande.
E alora bisogna méter zò le ré per far en modo che tuta sta roba no la finìssa nel lach de Garda.
Basta veder i mùci de legnàm che i riesse en qualche maniera a fermar.
 
E a 'sto proposit ho sentì al bar en sti di chì quela che poderìa passar per na barzeléta ma, credéme, quel che la contéva l'era serio entànt che 'l parléva.
Cossa disével sto chì? A farla corta (perché l'è partì da lontàm, ensoma 'l l'ha ciapàda ala larga) l'ha piantà su na questióm propri su quéla legna portàda dala Sarca e fermàda dai pompieri.
«Ma ve par giusto che mi per empizàr el caminéto e la fornèla deva nar en Comum, domandàr la pàrt, pagar, nar su nel bosch, taiàrmela e portarmela a cà con el camion che per fortuna me presta el Gino?
«Che fim fàla quela legna portada dal Sarca?
«Me sa che qualchedum dei pompieri el se l'embosca, cramento.»

Cornelio Galas