Senza telefonim... – Di Cornelio Galas

Quando se zerchéva na cabina col sachet de nailon pien de getoni... E quando la nona la alzava la voze se la parleva al telefono con zent lontana

Al dì d'ancòi no se pòl (gnancóra) nar for de cà senza la mascherina.
Ma gh'è n'altra roba che – se no la gavém drìo – te méte agitazióm: el telefonìm.
Perché dai e dai se fa pù 'n prèssa a contàr quei che no lo gà de quei che magari e ghe n'ha anca pù de um.
Parlo anca de mì, neh, che no vègna fòra che som contro sti agégi.

Fato sta che na volta, per dir, quando se néva for de cà, se se palpéva dapertut: bòm, le ciàvi dela machina le gò, quele dela casa anca, el portafòi coi soliti pochi soldi l'è al so post, no porto el pigiama come quela volta che ancora endroménz som stà ciamà dal postìm... tut bem, se pol nàr.
No adès, oltra a la mascherina, se varda per prima roba se gavém el telefonìm en scarsèla o nel borsèl.
E zà che ghe el tochém vardém subit se l'è en carica, se ha ciamà qualchedum entant che sem nài a pissàr, se gh'è mesàgi e compagnia bèla.

Vèi da domandàrse come se féva na volta senza sti telefonini. Ve digo subit che se gavés avù el telefonim quando lavorévo per el giornàl l'Adige, sarìa stà propri na bela comodità.
Entant perché co le foto se sarìa sparmià tut quel temp en camera oscura e tanti viàzi vers Trent a portarle.
E po' en qualsiasi banda te te fussa trovà a esser pronto a ciamar e farte ciamar da tuti quei che te dovevi ciamar o tut mal sentir en pressa per vegnìr a um dei mili problemi de la cronaca.
 
Me ricordo na volta, che ero a Treviglio per na partìa dela Benacense.
Finì tut, sòm nà en de na gabina drio el stadio con en chilo de getoni. E via a detàr formaziom e resocont de tut. Che su a Trent gh'era el Zén (no ghe c'entra la meditaziom) che entant che te parlévi el scriveva l'articol.
Pecà che dele volte Lutterotti (el Giorgio, quel che ha zugà anca nel Trent e nel Vicenza, per dir) el deventéva Tatterotti, Lotterotti, mai tut mal Pavarotti se dio vol.
Eco, en quel caso lì (e no sol en quel) el telefonìm el sarìa vegnù còmot de zert.
E difàti prima de nar en pensiòm som riussì ale tante a gavérghe en telefonim... e me paréva de aver trovà l'America.
 
Eco, se sa, el telefonìm, adès el serve. E no averghelo ne farìa sentìr embroiài.
Però gh'è da dir anca che dele volte s'el dròpa mal. Per esempi: te sei lì nel ristorante e drììn quel vizìm el risponde al telefonim a vòze che i lo sente anca en Australia.
Tra parentesi, me nona, quando la telefonéva ai so parenti la alzéva o la sbaséva la voze a seconda se quel al de là del telefono l'era vizim o lontàm da Vignole.
Pò che n'è de quei che gà sonerie strambe. Che dele volte dà propri fastidi o pèzo no te capìssi subit da che banda e perché vèi quel casìm.
 
Sentìr po' um che dìs monàe fa vegnìr propri el làt ai dinòci: «Che temp fàlo lì? A chi no piove se Dio vòl. Sé nài po' per fonghi? E cossa avé binà ensèma. Si ho fat l'orlo ale braghe del Carlèto te pòi vegnir a torle quando te vòi... ma no, no le è come l'altra volta. Tut mal basta provarle. Ah, hat sentì la Gina? Dighe che la pàssa a trovarne quando la gà temp neh... sì sì, stém tuti bem, tuti for dal let, ma de sti tempi... hat sentì ala televisiòm? Sì na roba che no se pòl gnanca enmaginar... no no no te me disturbi, sem drìo zamài al cafè...”.
Eco, dopo na telefonada del genere te vegnerìa voia de nar l'e dirghe: «Podréssela scortàrme le braghe anca a mi? E con quel che vanza fàrme en pararécie?»
 
Po' se sa, benedeto el telefonim quando gh'è urgenze de tuti i tipi. Che na volta bisognéva nar a zercar en bar o na gabìna... e se te eri en montagna...càvoi toi.
El telefonim el serve (el dovrìa, ve spiego subit perché) anca per savér dove se trova i fioi, quando i và en giro... Ho dìt dovrìa perché i bòci i s'è fati furbi col temp. Me fiòl, per esempi, chisà come mai, 'péna for dala porta el smòrza tut.
E quando la matina te ghe domandi 'n dove l'è stà e perché el telefonim no 'l déva segnài el te risponde:
«Oscia dove abita el Nicola (quel de la so classe) dele volte no gh'è campo...»
Me domando: ma tute le volte che 'l va fòra soratut de sera, vàlo semper dal Nicola? No ghe piàs le putéle?