Slusóri en fónt al bùs – Di Cornelio Galas

Si vede una luce in fondo al tunnel. Sperente che no sia el trèno che ne vegn dos…

Alora, da domàm, anca el Trentìm devènta zona bianca. Quela per capìrne dove no gh'è pù tanti divieti per el còvid.
Basta coi cuèrtafòch, se pòl magnar e béver sia fòra che denter i locali, anca bever el cafè o 'n biciér al bànch, senza paura che i te faga la multa e i méta en gazèri el barista.
E po' - vòt mèter? - nàr en giro per botéghe, nar a véderte en cine, en spetàcol.
Oh, no l'è che de cólp se pòl far tut quel che se féva prima de sta rogna del virus neh.
Ghe se vòl - ancora per pòch i dis - ancora la mascherina sul mus. Star lontani demò um da l'àlter. Lavàrse semper le mam.
Ma dài, pitòst che gnènt...
 
Se po' pensém n'atimìm a come èrem mèssi gnanca tante stimàne endrìo... Dài che se scomìnzia, come se dìs, a vedér i slusóri en fónt al bùs.
Anca se, me pàr, qualchedùm el tàca zà via a avérghe en po' de nostalgia, a esser destràni, a pensar quando - per dir - gh'era mén casìm.
Per esempi: l'alter dì encontro el Gino. Che 'l me fa: «Ah che bèl quando dopo le dése de sera no podéva nàr pu en giro nesùm. Che pàze sul stradóm...».
E mì: «Vàrda che no te pòi mìga nar endrìo a quando su la Màza paséva i càri tirài dai bòi, oscia».
Gnent da far, per el Gino se stéva meio quando la néva pèzo: «Gh'era mén ciàs, cramento. E secondo mì ne l'aria no gh'era pù quel saór de tòssech, che te diga».
 
Tutmal se va envanti. En televisiom e sui giornai i dìs che - grazie soratut ai vazìni - gh'è mem morti, mem zènt tacàda ale canéte nei ospedài.
I casini che è vegnù fòra de nof per l'Astrazeneca? Monae, par.
Entant però i ha cambià ancora le regole a chi darghelo e a chi l'è meio de no.
No so, forse en dì i ne dirà la verità su sta storia. Semper che i ne la diga.
Così come magari tra zinquantàni i nòssi neói i saverà se tuta sta storia l'è partìa dai pipistrèi o da qualcòs scampà de màm ai cinesi.
Entant dovém contentàrne de star atenti a no binàrne su qualcos che ne fàga star mal pù de la solita enfluenza, magari poch dopo esser tornài dal mare. O da na zéna en compagnia.
 
L'alter dì - storia vera neh - ero con do me veci amizi, bem o mal sem squasi coscriti.
El fa lù: «Che te diga, dopo la festa che avém fat per la me pensióm, giust la matina dopo me sentivo stràch, senza l'anda per butarme for dal let...».
Al che la spósa la gà dit: «Ma valà mona, i m'ha dit che t'hai ciucià almém do boze de vim sol ti... Credo bem che te gavévi endòs la sìmia».
Sì, ensoma, no bisogna farse ciapàr la testa dai bruti penséri. E gnànca dale bòze, se sa.
Meio però, così i sèita a dir, no pensar che adès se pòl far, magari en d'en dì, quel che da mesi - per el nòs bem i diseva - no s'è podù far.
 
E alora che ve diga, amìzi de l'Adigeto [Adesòt.it]? Bone ferie, ma co la testa sul col e la mascherina sul mus.
Che no l'è propri finìda del tut sta magagna.