Pèzo che nàr de... Not – Di Cornelio Galas

El «NOT» l’è el nof ospedal de Trent. Sperénte de morir lì, nelà, così savén che ne spèta ancor tanti ani da viver…

Che ve diga: pù se devènta vèci e pù se varda a come la và coi ospedài che te gài vizìm. No sia mai che 'n dì (pù lontàm che se pòda) te ghe ne avéssi bisogn, se sa.
L'è per quel, credo, che da quando som en pensióm, me lézo tut quel che se scrive e se dis su sto nòf ospedal grant che i dovrìa far a Trent.
El NOT i ghe ciàma: nàf ospedàl trentim.
L'è da ani, demò, che se parla de sto nòf, grant, bel, moderno ospedal che dovrìa vegnìr su per darghe la volta al Santa Chiara.
 
Ani e ani de progèti, de gare, de tribunai, de casìni.
Ale tante, en sti ultimi mesi, paréva che se podés pensar vizini i tempi dove tàca via a laoràr le ruspe.
Envéze no. La dita che ha pers l'apalto l'ha gà ancora qualcòs che no ghe torna.
Quel'altra la dis che enveze se pol nar envanti.
La Provincia che se mete de travérs e la volerìa tacar vìa prima che se pòl.
 
Ensoma, entant, dàmela tòmela, sem ancora chi che vardém quei tereni pieni de sgrébeni... E a pensar ala fim a come stupàr i busi del vecio ospedal.
Perché se sa, prima de nar nel nòf, bisogna che 'l nòf el sia pronto, se no te te trovi né fodrà né embastì.
Ma questo l'è gnent. Anca se sarìa zà assà.
Lèzo che l'Enac, l'ente che stà drìo ai aroplàni, la dìs che bisogna star atenti con quela tór de cristàl che i vorìa fàr nel nòf ospedal.
 
Oscia, che no vegna fòra che i aroplani i… ghe và adòs diaolporco.
Pò altri che parla dei casìni, del ciàs dele auto, dei treni propri lì vizim.
Cramento, me som dìt, no l'è miga problemi da poch.
E subit dopo: ma... ma... scólteme mi... a nesùni de quei che ha fàt quel progeto del nof ospedal gh'è mai vegnù en ment che lì vizim gh'era l'aeroport?
I treni? Le machine che passa avant e 'ndrè? Me pàr emposibil.
 
Sarìa come progetàr en convènt denòr a na discoteca (e no quando le è seràde per el covid, se sa).
O en centro de meditaziom vizìm a na fabrica dove i smartèla da la matina ala sera.
O quel che volé voi semper vizim a qualcos che rote le bale, tut mal.
Per l'amor de Dio, no sarìa la prima e l'ultima volta, che qualchedum fa na monàda e dopo bisogna mèterghe na pèza.
Però per sto NOT de ani n'è zà passai tanti. Posibile che a nessuni, en tut to temp, ghe sia vegnù en dubi su ste magagne?
 
Po' i parla anca de qualche local grant per l'università de medizina.
Ma anca chi: e pensarghe prima en sti ani che sem stài fermi? O bisognéva per quel far en nòf apalto e tacàr via el zòch de l'oca dal prinzìpi?
Gh'è anca da dir che, en fàto de ospedài, no l'è da ieri che per farne de novi se parte... dal quèrt e po' se se trova col cul pertèra.
Me ricordo, nei ani setanta, quando i aveva tacà via a far el nòf ospedal de Riva. Tuti i so bèi progeti, le so bele presentazióm, le so gare de apalto, perfim la prima préda mesa per tera dal politico de turno.
 
E via coi lavori. Su le pareàne. Malta e gèss. Pò tuti fermi. No s'è mai savù de preciso perché.
Fato sta che, col passar dei ani, zerte piastrèle le scominziéva a «vegnir su» da l'ùmit.
Po' anca i muri de fòra i féva giàcom giàcom.
Ala fìm qualchedùm ha deciso che l'ospedal nòf l'èra meio farlo a Arco.
E alora quele getàde de ciménto le è deventàde quela che ancora adés i ghe ciàma «l'incompiuta».
 
Prima locali per el vecio comprensorio.
Pò per le scòle quando i era drìo a laoràr al liceo de Riva.
Po' el progèto per sgrandàr la casa de riposo de riva.
Tut trane che ospedal nòf. Ancora adès quando te domandi dove nar a cambiar medico de base i te dìs: «Varda, và zo a l'incompiuta de Riva che te te la cavi en d'en quart d'ora.»
Capisset come?