Métela su, tìrela zó... – Di Cornelio Galas

Da domàm no se è pù obligài a tegnìr sul mùs la mascherina a l'avèrta – Ma tut màl meio no desmentegarla casa...

Da domàm – così i ha deciso zó a Roma – no se è pù obligài a tegnìr sul mùs la mascherina a l'avèrta.
Però, òcio che dénter nei locali (tràne che a vòssa cà, se sa, perché l'è difìzile che i vegna a controlarve) la mascherina dovré ancora tegnìrla se ve trovè (questo anca a l'avèrta neh) a mém d'en mèter dai altri.
E tut màl meio no desmentegarla casa.
 
Sèm su la bona stràa per tornar liberi come na volta senza tanti rochèi endòs? Parerìa de sì.
Ma adès gh'è zà do tipi de zènt.
El prìm: quel de quei che no ha mai patì le mascherine.
El secónt: quel de quei che dài e dài, a forza de seitàr a meterle, el s'è anca abituà.
 
Partìm propri da 'sti ultimi. I è quei che zamài senza mascherina i se senterìa squasi for de posto.
Come se ensòma de colp no i podès pù portar el capèl (o la bandàna) su la testa per cuertàr la pelòia.
O i ociài da sól per darse na pàra e no fàr veder le ociàie.
O le braghe longhe anca d'istà per no sporcar i dinòci quando i s'endinòcia en ciésa.
 
Ensoma, la mascherina, a questi chì, la gà dàt na màm anca a no far veder che no i se fa bèm la barba la matina o che i gà i denti màrzi patòchi.
Ma soratut che i gà n'espressióm strana quando i te parla, quando i te scólta.
 
Dàmela tòmela la mascherina a questi la gh'è vegnùa comoda. E de colp no se pòl, dài, tiràrghe via el lòlo.
Dopo, per amor de Dio neh, bisogna star atenti. La rogna del virus – come i sèita a dirne – no l'è gnancóra finìa.
Meio averghe na mascherina semper drìo mam, che no se sa mai.
Che no vegna fòra come l'istà passada, quando ne sentìvem zamai tuti fòr dai tóvi e envéze ne sèm trovai de colp a gratarne el cul per le ortigàe.
 
Disénte anca, soto soto, che sarà propri questi chì che no i vol molàr la mascherina, a tegnirne su co le recie, a ricordarne che no è finì la via crucis.
Basta però che no i rota le bale, se sa. Che no i faga sentir quei senza mascherina e a posto tutmal co le regole, come quei che dovrìa vergognarse, quei che - come suzéde a Dro - quando i dis «Te la càcio»... te la gài zà entorno.
 
E vegnìm ai altri, quei che no i vedeva l'ora de tirarsela via sta mascherina, diaolporco.
Eco, sti chì – non tuti se sa – gò idea che zà stasera i farà en balóm.
Magari brusàndo nel giardìm quel pachét nòf de mascherine che dopo mesi che no ghe n'era adés i te dà squasi en omagio quando te compri qualcòs de pù del giornale e dele ciche.
No putèi, no. Meio spetar, tegnìle via quéle mascherine e lasséle nel borsèl, tacàe al gómbet se no savé dove meterle.
Sat mai che vègna fòra n'altra variante (come ghe ciàmei adès? Ah sì...plus), n'altro fogolàr e soratut qualchedum che magari el me diga che bisogna far en terz richiamo dei vazìni prima dela fim de l'istà.
 
Meio far en mèz pass envanti che trèi endrìo no?
Che po', dai, no va miga el mondo dal balòm su drit se stém atenti ancora en cicìn.
E po' volé méter? Se - meti - desmenteghé la mascherina a casa, podé semper nar da quei che sèita a portarla e dirghe:
«Scòlta, fùmit? Sì? No, no me serve da 'mpizàr ma na mascherina en prest. En cambio te dago en zigarét...»