Quéle nòsse ultime ciacolàde... – Di Cornelio Galas

Scuséme se stavolta no scrivo robe lezére, da rider, da no pensarghe su pu de tant... È mort Franca Bazzanella, «Bazzy» per i amizi. E i era tanti

Scuséme se stavolta no scrivo robe lezére, da rider, da no pensarghe su pu de tant.
Ma l'è stàda na stimàna dura. De quele che no se volerìa mai passar.
È mort na gran donna de Riva, na me cara amica, ma soratut una che la ghe credeva fim en font a quel che se dovrìa far en politica, e no sol per la nossa zent.
Parlo dela Franca Bazzanella, «Bazzy» per i amizi.

Erem nati propri L'istés dì, de l'istés més, de l'Istés am: disdòto de giugno del zinquantasei.
Ela però – la me l'ha semper savù dir, soratùt quando se beghéva – en po' de ore prima de mi.
«Scólteme mì – la diséva col so modo de far – sóm vegnùa al mondo prima de ti... 'n savrò qualcos de pù no?»
Vèndro, al zimitèri de Riva, tanti i l'ha ricordàda. Anca sui giornài.
No serve, me par, tacàrghe alter.

Però, che ve diga, gò ancora el magóm, se penso che sóm riussì a parlarghe propri pochi dì prima che la néssa... no so 'n dove, no so 'n dove che l'è adès, spero sol che la stàga meio, almém pù en pàze.
L'era da tant che no ne sentìvem. Me sa da quela volta che gavévo dàt el premio «Bis del Lufàm» de Televignole, sì quel che – a parte l'àm passà per colpa del covid – ogni am ghe dàgo a quei che se fa en quatro per cambiar sto mondo. Senza pretender soldi, careghe, racomandaziom.
 
Bèm, tut è partì da do righe che la Bazzy l'aveva mès en Fèsbuch. Do fotografie: una de 'n girèl, n'altra de na carozèla. La zerchéva ste do robe. No se capiva bem per chìe.
Alora ghe domando: «'sa suzéde? Per chi le zérchit?»
Ela no la m'ha rispondù subit. È nà via qualche ora.
Po' la me scrive: «Pòdo telefonarte?» - Oscia, dìme.

E vèi fòra che da 'n po' de temp ghe gireva la testa. Che no stéva pù sule so gambe. Che l'aveva fàt mili esami ma nessuni gh'envegnìva fòra.
«Cramento – gò dit – no sarà miga el còvid...»
«No – la me fa – no ma no i rièsse a capir... entànt me par de star semper pèzo.»
 
Passa qualche dì. Erem d'acordi de trovarne, de vederne senza quei trabicoi de telefonini e mesagi en tra mèz.
Po' la me dis che l'è en ospedal, a Trent.
Sento che la fa fadiga a parlar. Ma la gà ancora la forza per encazzàrse: «Dovrìa averghe dó o tré cancri entorno... adès vedém de ciapàrli um per volta. Beh, no l'è la prima volta e tì t'el sài, che fago la chemio...».

Zà, me ricordo. A so temp, quando la gavéva avù problemi zerto men cativi, passài co n'operaziom che per fortuna l'era nàda bem, gavévo fàt conosser la canzom del Battiato, la Cura. L'aveva scrit col rosseto le parole de quela canzom su 'n d'en spègio.
 
E po' è arivà el dì del nòs compleano. Gnànca el temp de farne i auguri, de parlarse en qualche modo per telefono.
Che sentivo che éla l'avrìa volù dirme altre robe... ma se capìva che zamai no la ghe la féva pù.
Le nòsse ciacolàde l'è finìde quel dopodisnàr. Per semper.
 
E scuséme, ma la mòco chi ancòi. Propri perché no ghe la fàgo a nar envanti...
Ciao Bazzy, el rest t'el sài sol ti.