Me som ensognà che... – Di Cornelio Galas

Beh, el savém tuti, no? I sogni i finìs a l’alba, i incubi i resta fòr e fòr

No so se l'è per el calt (o per el storzicòl che me vèi quando empìzo el climatizatór), perché bevo massa bire, perché lèzo massa giornai e vardo massa telegiornai e quel che i scrive su internet, o che 'n sònte mi, magari l'è colpa del cagnòt che 'l seita a sbaiar perché el vol i biscoti.
Boh, no 'l so. Ma da temp fago dei sogni che me par veri. E che sol quando vegno fora dal let... capisso che l'era sogni.

V'en digo qualchedùm. No sté torme per el cul neh, l'è sol sogni cramento.
Vago a far benzina. Ghe dago quaranta euri e quel che dropa la pompa el me dis:
«Oscia, vara che sém a trentazinque e 'l serbatori l'è zamai piem neh. Che faga, te meta el rest en d'ena tanica da portar via?»
 
Me sènto zó en d'en bar e ordino en tost. Ghe domando de taiàrmel en do tochi e 'l camerier el me fa:
«Se 'l vòl el taio anca en quatro e ghe porto altri tre piatini, vist che l'è co la moiér e do boci... ghe serve anca i mantini? Se gavé sé, ve porto anca quatro bicieri de aqua del rubinet neh. Ah no... el se figura, basta che 'l me paga el tost entrech.»
 
La me sposa la vèi de volta da so mama che la va a trovar tute le sere.
E la me dis: «Ho encontrà per stràa en siór che 'l m'ha dit: Dai siora che la compagno fim a cà perché en sti posti, de sera, l'è meio no nar en giro da soli...».
E la me sposa: «No, grazie, abito propri chi vizim. E po' no védel che lazó gh'è do vigili messi chi dal Comum per farte nar en giro en paze?»
 
Sènto en casìm de clacson su la stràa. Oscia, i la gà tuti con um cola machina grossa che 'l và ai trenta a l'ora.
Aa fim sto zóvem, bem vestì (se vede che 'l gà soldi) el smonta e 'l ghe dis a quei de drio:
«Ma savé che chi no se pol nar massa svelti? Che gh'è en sach de zent che traversa la stràa? Volè ciapàrli soto?»
 
Da denter n'apartament al secont piano, propri en mèz al paés, se sente en ciàs che basta la metà.
Pò um che gòsa: «Mi te copo, se no te me vòi pù, mi te copo... Hat capì?».
E 'l và sul pogiòl con en cortèl lonch mez meter. Dala finestra vizim vei fòra n'om col telefonim en mam:
«Ho 'pena ciamà i carabinieri. Ti fa qualcòs de brut che vegno lì mì a fàrtela paìr...at capì?»
 
Al supermercà, ala cassa, en sior el gà el carèl piem, anzi, de pù.
Drio gh'è na veciota con en scartòz en mam.
El sior el se volta e 'l ghe dis ala veciota: «Ah, la vaga envanti ela valà... vist che l'ha sol quela roba lì».
 
Sula pista ciclopedonale um co la bici el passa via come en razzo. E per en pel no 'l ciàpa soto do vecioti che và a pè.
N'altro, en bici, che vei da drio, prima el sóna col campanelim.
Pò el va envanti e quando l'è vizim a quel che coreva el ghe dis: «Tèi, me par che te vai come el Ganna, quel che bate tuti co le bici da corsa. Scolteme mi, te sei sprecà per sti posti. Te dovréssi nar al velodromo de Mori dove te gavréssi pù sodisfazióm. Capì come?»
 
Al ristorante gh'è na faméa con quatro boci che sèita a gosar e a corer per la sala.
Anca el camerier el deve star atènto se nol vol finir per tera co le pize che gà sui brazi.
Vizim, na copia: marì, sposa co 'n fiol sui oto ani. El pare de sto tàol a 'n zerto punto el ghe mola na sberla a so fiol che, poréto, no 'l diséva gnanca baf.
E 'l ghe dis a sto bocia: «El so che no te t'el meriti sto slavadènt ma l'è per méterte en testa bèm che quel che fa quei boci ti no te dovrài mai farlo... Ocio a tegnìrtel bèm a mént neh...»
E quei altri che lo varda mal e dis: «Ma varda ti, che educaziom che 'l ghe dà al fiol a forza de sberle...».
 
Um el se ferma en autostrada. En de na piazòla. El tira zó el cagnot e 'l lo lassa lì.
Pò el monta de nof en auto e 'l fa per partir. Ma la machina no la va pù.
Alora se ferma n'omenet: «Gh'è qualcos che no va?»
«Sì, no me parte la machina... E avevo fat smontar el cagnot... per farlo... mi sì, per farlo pissàr.»
«Ah no gh'è problemi. Monté su tuti doi che ve porto al grill chi vizim...»
I parte e, quando i ariva al grill, l'omenét el fa smontar l'altro. E, col cagnot, el parte senza dir né tréi né séi.
Ma ridendo soto i bafi...
 
Som al mar. Su 'na sdraio (costà n’ira de Dio) e soto n'ombrelom (costà... n'elamadona).
Vizim um coi ociài da sol che parla co n'alter de come cambia sto clima.
«Massa calt. Po' massa aqua. Disastri. Così no se pol nar envanti. E sem noi – el dis – quei che ha fat sti gazeri, che sporca, che fa robe che no dovréssem far.»
Entant i dói i fuma e i buta le ciche nela sabia, i beve do bire e i le lassa soto i sdrai, i magna en gelato e i buta via le carte, ghe scampa col vent i giornai e... che i se ciàva.
Po' i va butàrse ne l'aqua. E alora mi togo su tuta la so sporcaria e ghe la meto nei so zaini.... Che i se ciava anca lori.
 
Bom, me som sveià. No me ricordo pù cosa ho sognà stanot.
Forsi dovrìa tor zó le goze per dormir meio.