Le reclàm de adès – Di Cornelio Galas

El capiré che, quando el Berlusconi fiòl el se vanta de aver aumentà la vendita de publicità, me toco le bàle?

Per carità, no digo che l'era meio el Carosèlo dei me tempi.
Disénte che per noi, alora putelòti, quei l'era i ultimi minuti che se podéva star en sala a vardar la televisióm.
E forsi l'è per quel che ne ricordém de quei picoi «cine» per la publizità.
Tutmal no i era gnanca mal, dai, e soratut lì, en quei dése (forsi depù?) minuti gh'era la reclàm.

No anca en mez ai altri programi, ai cine pù longhi coi caobòi e indiani o la nona del Corsaro Nero o Fafifurni per capirne (con quei de la me età, se sa).
Figurarse po' se i avés fat publizità en méz a... Tribuna Politica o ale leziom del maestro Manzi.
Adès? Beh, entant bisogna dir che no gh'è pù, come a quei tempi, sol en canal dela televisiom: el prim dela Rai. Tanto che col telecomando te pòdi star lì a «sgarbiàr» anca per ore fim che no te trovi quel che te piàs.
E de reclàm ghe n'è dapertut.
Anzi, gh'è anca zerti canài Tv che ì fa sol reclàm. Dì e nòt. Gnènt da dir, per amor de Dio, se sa che questa l'è, come ghe ciàmei?, l'anima dei boteghèri, del comercio ensoma.

Però, dai, gh'è modo e modo. Propri en par de stimàne endrìo, no stévo tant bém.
Me som butà nel lèt e, butà zó do pirole, ho scominzià a zercar qualcòs da vardar ala televisiom.
Som capità su 'n canàl dove era scominzià da poch en cine che avev zà vist ma che me sarìa piasù vardàr de nòf.
Alora alzo el volume, me còmodo el cosìm soto la testa e tàco via a vardar.
Gnanca el temp de bever en gòz de aqua... e eco la reclam. Tuta en inglés tra l'alter.
Ma perché le reclàm dei profumi (da dona ma anca da òm) i le fa sol en inglés?
Perché tanto quando te vai a crompar en profumo no serve ciacére ma sol en bòm nàs?
 
Va bèm. Ritàca via el cine. È passà forsi dése minuti. E trac, de nòf la reclam. De quei che ricicla el vedro.
Ma va bem. El so. L'è da mesi zamài che anca chì a Vignole a seconda dei dì se mete fòra el bidom del vedro, quel de l'umido, quel del sech, quel dela plastica e quel del séch... cramento.
Tirém inànz. Quando ariva la terza reclam me gira le bale. E cambio canale.
Chì la reclàm i la fa subit. L'è quela solita dei divani. Che i è semper en oferta tanto che vei da domandarse quando mai i vende quela roba al prezo piem.
Perché per far en sconto del zinquanta per zento deve esserghe pur stà (se no 'l gh' ancora) en costo del zento per zento no?
 
E alora via n'altra volta.
Zercando qualcòs che se pòda vardar almen vinti-trenta minuti de fila senza che vegna denter la reclam.
Gnent da far.
Ala fim (sarà stà le pirole?) m'endromenzo e resto lì en mùa fim a l'ora de zéna quando la sposa la me gòsa dala cosìna che la zéna l'è pronta.
E tra en cuciàr de minestra e l'alter la me dis anca:
«Varda che no te fa miga bèm star tante ore davanti ala televisióm neh. Te se bloca la digestióm e po' te me pari anca pù nervos dopo... con tuti quei cine dove i sbara che te vardi sdravacà nel let».
 
Eco, quando la me dìs cosìta, no gò pù gnanca la forza de ribàter.
Perché se anca disés «baf» sò zà che la me dirìa:
«Eco, vèdit che te resti agità dopo? E 'l so mi che stanòt te te remenerài nel lèt per ore prima de endromenzarte....».
Boh, no so pù che dir e far. E se nés a cromparme en divano nòf?